Salmaan & Siciid: Qur’aan Baan Wadanaa!! (1)

Rabbi Subxaanahu Watacaalaa wuxuu Qur’aanka Kariimka ah noogu sheegay

in Qur’aanka Kariimka ah Qofkii qaata oo Qabta, barta oo bara, Ku camal fala oo Akhlaaqdiisa dhawra, uu u noqdo Sharaf, Cizzi, Naxariis, Caafimaad, Hanuun, Xoolo iyo Xoog.. Si Kooban haddaan u iraahdo Qofka Qur’aanka ilaahay siiyaa waa qof: qalabaysan oo wax walbii u dhamaystiran yihiin.. Wax walba oo qofku adduunyadan ku fekerana ilaahay gacantiisa geliyey!!

Qisadan aan akhristayaasha la wadaagayo, wexey daba socotaa qisooyinkii Qur’aanka Kariimka iyo Ehelkiisa, iyo Sharafta Qur’aanka Ilaahay Qofka ugu yeelo, Taasoo ku bixin karta Qof Kasta oo Muslima inuu isaguna isku dayo, Ubadkiisana kula dadaalo, wax kale inaanu u qaban, laakiin: Kitaabka Ilaahay Barto ama Baro, Tasoo wax walba ka kaafineysa sidaan sheegnay..

Qisadan wexey ku socotaa Saaxiibkeen (Salmaan) iyo Saaxiibkiis (Siciid).. Magacyadan Ma aha kuwoodii runta ahaa, Laakiin waa u bixineynaa, kuwa Nabad gala oo Nolol Fiican hela iney noqdaan baan rajayneynaa..

Qisada waxaan ka weriyey (Salmaan) siduu afkiisa iigaga waramay, weligiisna wuxuu uga waramay siduu ii sheegay (Macalinkiisii) iyo (Aniga) oo qofkii labaad noqday, iyadoo ay muddo dhawr iyo toban sanaa kasoo wareegatey..iyadoo aan intii macaan iyo xawaash aan ku dari karey ku daray waatan sheekadii (Salmaan) iyo (Siciid) iyo (Sharaftii Qur’aanka Kariimka ah)..

Wuxuu yiri Salmaan: Sheekhow waxaan ku dhashay gobol ka mid ah deegaanada Soomaalida ee Gumaysiga muddada dheer ku jirey..magaalada aan ku dhashay, oo aan ku barbaaray aniga iyo Saaxiibkay (Siciid) waa magaalo caan ku ah Qur’aanka Kariimka iyo barashadiisa Ilaahay Fadligiis..Inanku haduu 10 sano jirsado oo aanu Qur’aanka kor ka wada qaban waa mid aan la tirsan..

Ilaahay wuxuu nagu irzaaqay Macalin wanaagsan oo Sheekh Cali Suufi Qur’aanka iyo Tajwiidka ka bartay.. Macalinkaas ayaa Magaalada yimi, dugsigiisa ayaan aniga iyo saaxiibkay Qur’aanka iyo Tajwiidkiisa ku baranay..Waana dhamaynay Qur’aanka, si fiicanna waa u xifdinay Al Xamdulilaah…Saaxiibkay Weliba duruuf adag ayaa lasoo gudboonaatey oo aabihiis ayaa xanuun Maskaxda ah gaarey, oo hawl gabay, waxaa lasoo halgantey oo har iyo hoyaad aan seexan hooyadiis, ilaa uu qur’aanka ka xifdiyo.. wexey ku shaqayn jirtey gacanteeda, xitaa iney xaabada iibiso si ay wiilkeeda u koriso.. Saaxiibkay waxaanu ahayn xera wadaag, mana aanan kala hari jirin, labada guri kii aanu wax ka helno ayaan ka cuni jirney..
Markii aanu dhawr iyo toban jirsaney waxaa na galay hammi wax barasho diin iyo adduunyo.. waxaanu usoo bokhoolney xagii magaalooyinka waaweyn..Waxaa ilaahay noo fududeeyey Machad Islaami ah inaan galno, oo diinta iyo Luqadda Carabiga lagu barto, ilaa qaybta dugsiga dhexe ayaan dhiganay.. Waxaanu nahay dhalin yaryara, dadna aaney magaalada u joogin, waxna haysan.. Hayeeshee weli waxaa na haysa hammuun aanu u qabno Cilmiga Sharciga iyo diinta, kitaabka Ilaahayna Laabta ayaan ku sidanaa, Carabkana intii tabara waanu ku haynaa, oo waanu wada akhrinaa.. Weliba Saaxiibkay Cod macaan oo dadka xaaddu la istaagto ayaa Rabbi ugu daray Qur’aanka weelayntiisa..

Waxaanu Mar labaad usoo dhaqaaqnay safar aqoon baadigoobkeed ah (Dalabul Cilmi).. Dal ka mid ah dalalka deriska ah ayaanu abbaarnay oo Machad Fiican oo Sucuudigu ka furay naloogu sheegay..Laakiin Wax nooga horreeya, cid aanu ka naqaanno, iyo farsama aan ku geli karno markaa nooma cadda..

Xuduuda markii aanu nimi waxaanu aragnay dadka in lagu xirayo aqoonsi iyo fiiso, cidii laga waayana meesha laga celinayo, hadeyba xarig ka badbaado..Askarigii ilaalada ahaa markaan soo hor istaagney ayuu yiri: Keena waraaqaha aqoonsiga? Waxaanu niri: Ma Wadano! oo Maxaad ahaydeen? Waxaanu Nahay, Soomaali, Arday (Dalabul Cilmi) u socota!! Wuxuu yiri: Aaway Fiisihii aad wadanka ku geli lahaydeen? Ma wadano Fiise!! oo Maxaad wadataan haddaa? Waxaanu Wadanaa Qur’aan!! Wuxuu yiri: Yaa..!! Maxaad Wadataan? Waxaaaaaaanu Wadanaa: Qur’aaaaaan!!

Wexey ku noqotay markii u horraysay oo noloshiisi lagu yiraahdo: Waxaan wataa Qur’aan!! Laakiin Waa askari Muslim ah, yuu aqoon badan lahaan, wuxuu garanayaa Maqaamka iyo Maamuuska Qur’aanku Leeyahay.. Wuxuu yiri: Anigu Qur’aan Badan ma aqaan laakiin Suuratu Yaasiin ayaan aqaane, bal akhriya qaybteeda hore? Saaxiibkay Siciid ayaan ku iri: Saaxiib bal Akhri Suuratu Yaasiin adaa iga cod macaane!! Saaxiibkay Wuxuu Bisinka u Qabtay Suuratu Yaasiin, Tajwiidna waa ku akhriyey!! Askarigii ilin ayaa kusoo istaagtey.. Wuxuu yiri: Nimanyohow yaab baad leedihiine, Niman aan celin karo, ama xiri karo ma tihidiin, idin mana sii deyn karo oo waa layga sareeyaaye, bal i suga Sarkaalka iga sarreeya ayaan arrinkiina u sheegayaaye!!

Askarigii wuu baxay, dadkii weli waa na ag taag taagan yihiin, wax yar ka dib wuxuu soo noqday isagoo uu la socdo, sarkaalkii goobta xuduudka ciidankeeda u sarreeyey.. Meesha waxaa dhooban dadkii rabey iney galaan, dadkii la celiyey, kuwa la xiray, askartii ilaalada ahayd oo qorya wadata.. Sarkaalkii wuxuu yiri: Adeerayaal Wax Waraaqaa iyo Fiiso ma wadataan miyaa? Haa Ma wadano.. oo Qur’aan ayaad wadataan? Haa Al Xamdulilah.. Bal Akhriya hadda Qur’aanka aan idin dhegeysanee.. Aayada Qur’aan ah ayaan aniga iyo Saaxiibkay Siciidba akhrinay..Sarkaalkii iyo Askartii kale iyo Dadkii giddi waa la wada aamusay.. Askarta Qoryihii ayey dhulka dhigteen!! Markii aan dhamaynay, ayuu yiri Sarkaalkii: Soo Baxa.. Xafiiskiisi ayuu na keenay.. Wuxuu u yeeray Dureewalkiisi.. Wuxuu Ku yiri: Gaarigayga Nimankaan Ardada ah hadda Ku Qaad.. Magaaladii Caasimadda ahayd Meesha ay ka rabaan oo ku yiraahdaan gey! Ka dibna soo noqo!! Halkii ayuu nagu sagootiyey.. Waa u ducayney khayr Allaha ku siiyaanu ku niri..

Iyadoo dadkii meesha joogaan fiisooyinka watey, oo la kala horayo, ayaa aniga iyo Saaxiibkay Siciid waxaa nala ku soo qaaday gaarigii booliska, labadayada keliya, ninkiina wuxuu na keenay Magaaladii Caasimadda ahayd.. Wuxuu yiri: Xaggee idin geeyaa, cid meesha kama naqaano, waqtigu waqtigii taleefanada gacanta la bartay maaha, waxaanu niri: Masjidka Na dhig, Culimo iisoo duceeya, Khayr Allaha ku siiyo..

Magaaladii bartameheeda ayaanu taaganahay, cid kama naqaan, hal shilinna ma wadano, Laakiin ha illaawinina inaan (Qur’aan) wadano.. sidee wax noogu suurtoobeen? Xagee seexan doonaa? Machadkii aan u soo safarnay ma heli doonaa? Cajaa’ibta Qisooyinkaas iyo wixii aan la kulannay waa inoo qaybta 2aad Inshallaah.